७२ एक दिन (विक्रम सुब्बा)

आउँनेछ जिन्दगीमा एक दिन
तातो आँशु आफै झर्ने दिन
थामिनसक्नु भक्कानिने दिन
आँशु सिद्धिने तर रुन नसिद्धिने दिन
आउँनेछ जिन्दगीमा एक दिन

आउँनेछ जिन्दगीमा एक दिन
आमा-ममता सम्झी गंभीर हुने दिन
मायालु सम्झेर टोलाउँने दिन
साथीहरूको भावुक यादको दिन
आउँनेछ जिन्दगीमा एक दिन

आउँनेछ जिन्दगीमा एक दिन
बालबच्चाले घरै खालि छोडेको दिन
सुनसान घरले तर्साउँने दिन
एक्लोपनमा नै खुशी खोज्ने दिन
बिनासहारै जिउँने साहसिलो दिन
दुःख नमानी दुनियाबाट जाने दिन
आउँनेछ जिन्दगीमा एक दिन
त्यसपछि कहिल्यै नआउँने दिन !

(5 June 2019)